बालविवाह न्यूनीकरणमा बालबालिका

बालविवाह न्यूनीकरणमा बालबालिका

जाजरकोट, २३ असार । बालविवाह न्यूनीकरण गर्ने अभियानमा आफूहरु लागिपर्ने प्रतिबद्धता बालबालिकाले गरेका छन् । 

जिल्लास्तरीय बाल भेलामा बिहीबार उनीहरुले यस्तो प्रतिबद्धता व्यक्त गरेका हुन् । जिल्लामा ५० प्रतिशतभन्दा बढीको बालविवाह हुने गरेको तथ्याङ्क छ । 

कम उमेरमा विवाह नगर्ने र अरूलाई पनि गर्न नदिने कार्यमा सक्रियताकासाथ लागिपर्ने जुनीचाँदे गाउँपालिकाकी रमा पुनले बताउनुभयो । बालबालिका र अभिभावक दुबैले बालविवाह विरुद्धको अभियानमा लाग्नुपर्दछ, उहाँले भन्नुभयो– “चेतनाको अभावले बालविवाह बढेको हुँदा यसका विरुद्ध समाजमा सचेतना अभियान नै सञ्चालन गर्नुपर्दछ ।” 

भेलाका सहभागीले बालबालिकासम्बन्धी कानुन, नीति र विकास योजना निर्माणमा सहभागी हुने, शिक्षा, स्वास्थ्य, सुरक्षालगायत आधारभूत सेवा प्रवाह प्रणालीलाई बालमैत्री बनाउँदै एक स्थानीय तहमा तीन वर्षभित्र कम्तीमा एक नमुना बालमैत्री विद्यालय घोषणा गर्ने, आगामी पाँच वर्षभित्र जिल्लालाई बालमैत्री घोषणा गर्न रणनीतिक योजना परिमार्जन गर्ने प्रतिबद्धता व्यक्त गरिएको छ । 

त्यस्तै भेलाले स्थानीय विकास योजना तर्जुमा प्रक्रिया र अन्य सामाजिक क्रियाकलापमा बालबालिकाको अर्थपूर्ण सहभागिता सुनिश्चित गर्ने, सबै प्रकारका विभेद, शोषण, दुव्र्यवहार र उपेक्षासहित बालविवाह न्यूनीकरणमा क्रियाशील रहँदै पाँच वर्षभित्र जाजरकोटलाई बालहिंसा र बाल श्रममुक्त बनाउने सातबुँदे प्रतिबद्धतापत्रसमेत जारी गरिएको छ । 

जिल्ला बालकल्याण समितिको आयोजनामा खलङ्गामा भएको सो दुईदिने बाल भेलामा तीन नगरपालिका र चार गाउँपालिकाका एकसय बालबालिका सहभागी थिए । त्यस क्रममा बालबालिकाले बालअधिकार, बालबचाउ, बालविकास, बालसंरक्षण र बाल सहभागिताका विषयमा अन्तक्र्रिया गरेको महिला तथा बालबालिका अधिकृत पङ्कजाकुमार जोशीले बताउनुभयो । 

भेलाले दीर्घबहादुर बस्नेतको अध्यक्षतामा ११ सदस्यीय जिल्ला बालसञ्जालसमेत गठन गरेको छ । रासस